Zec 4 | MEU | STEP | Bena lau ida a hereva-hereva aneruna ma ema, e haogu, mahuta tauna bema haoa na heto.

Zechariah 4

Peroveta tauna ena mata-hanai iha-imana

1 Bena lau ida a hereva-hereva aneruna ma ema, e haogu, mahuta tauna bema haoa na heto. 2 Bena ia ese e nanadaigu, eto, Dahaka o itaiamu? Lau nato, Lamepa patana ta,gold ḡauna, na itaiamu, dorina ai na dihu ta, bona ia latanai lamepa hitu, bona dorina lamepadia ta ta na mai ududia hitu. 3 Ia badibadinai na olive audia rua, ta dihu idibana kahana ai, ma ta laurina kahana ai. 4 Bena lau ida a hereva-hereva aneruna na nanadaia, nato, Ḡauka e, ini na dahaka? 5 Bena lau ida a hereva-hereva aneruna ese e haere henigu, eto, Oi na asi dibamu ini na dahaka a? Lau nato, Ḡauka e, lasi. 6 Bena ia ese e hamaorogu, eto, Ina na Iehova ena hereva Serubabele enai. Iehova Sabaota na ini e gwau tomamu: Dia goada amo eiava dia siahu amo, a Laumagu amo. 7 Ororo badana e, oi na dahaka? Serubabele vairanai oi na taora ai ba hahelao, bena ia ese atai nadina baine mailaia, bona taunimanima na bae lolo, baeto, Harihari-bada, harihari-bada ienai baine mia. 8 Iehova ena hereva ma ta danu egu ai e kau, eto, 9 Serubabele imana ese ina dubu badina vada e atoa, bona ia ese baine haḡuḡurua danu. Bena vada ba diba, Iehova Sabaota ese vada e siaigu mai dekemu ai. 10 Badina be ḡau maraḡidia dinana vada e dadaraia tauna na baine moale, bona gini-maoro varona baine itaia Serubabele imana ai.

Ini hituosi na Iehova matana, tanobada idoinai e neneamu. 11 Bena na nanadaia, nato, Ini olive audia ruaosi, lamepa patana idibana kahana ai bona laurina kahana ai be dahaka? 12 Nega iharuana ma na nanadaia, nato, Hari olive audia rigidia ruaosi,gold baubaudia, dehoro e seilaia ḡaudia, badibadidiai e miamu be dahaka? 13 Ia ese e nanadaigu, eto, Oi asi dibamu ini na dahaka a? Lau nato, Ḡauka e, lasi. 14 Bena ia eto, Ini na e horodia taudia raruosi tanobada idoinai Lohiana badibadinai e ginimu taudia.